Të hënën e 17 tetorit, Përfaqësuesi i Posaçëm i Bashkimit Evropian(BE) për Dialogun Kosovë-Serbi, Miroslav Lajçak, do të jetë për vizitë në Beograd, ku në takim do të pritet nga presidenti i Serbisë, Aleksandar Vuçiq.
Takimi do të mbahet në orën 13:30, në ndërtesën e Presidencës së Serbisë, raportojnë mediat serbe.
Ky i fundit tha se pret që diskutimi i sotëm me Lajçakun të jetë i vështirë, raporton N1.
Ai shtoi se edhe të tjerët me të cilët ka biseduar për Kosovën “nuk e kanë përmendur vitin 2024 si afat për arritjen e marrëveshjes, por vetëm se në pyetje janë javë”.
Ai po ashtu tha se vendi i tij, në 24 vjetët e fundit, nuk ka qenë në një pozitë të këtillë kaq të vështirë.
Ndryshe, kjo vizitë e Lajçakut në Beograd vjen një javë pas asaj në Kosovë.
Emisari Lajçak, më 13 tetor ishte në Kosovë, ku në takim u prit nga kryeministri i Kosovës, Albin Kurti dhe zëvendëskryeministri Besnik Bislimi.
Pas takimit, ai kishte thënë se është mirë që të ketë progres dhe normalizim të dialogut Kosovë-Serbi, para zgjedhjeve në Bashkimin Evropian dhe në Shtetet e Bashkuara të Amerikës, sepse sipas tij, këto zgjedhje do ta zhvendosin vëmendjen prej dialogut.
Ai kishte theksuar se pikërisht për këtë arsye, do të jetë edhe në Beograd.