Kryeministri i Kosovës, Albin Kurti, pas takimit me të dërguarin special të ShBA-së, Gabriel Escobar, ka thënë se emisari Escobar është mik i madh i Kosovës dhe kontribuues i paqes dhe demokratizimit, jo vetëm në Kosovë, por edhe në rajon.
Kreu i Qeverisë, Kurti ka thënë se në këtë takim janë diskutuar shumë tema, si partneriteti ndërmjet dy vendeve, progresi dhe reformat në Kosovë, procesi i dialogut e shumë të tjera.
“Me Escobar folëm për shumë tema përfshirë edhe për dialogun në mes të Kosovës dhe Serbisë. Për gatishmërinë me takime e me arritjet e marrëveshjes, Kosova është e gatshme për marrëveshje me njohje reciproke në qendër”.
Kurti ka thënë se Kosova është palë kreative dhe konstruktive në procesin e dialogut.
“Rreshtimi i Kosovës me ShBA-në, Bashkimin Evropian për sanksione ndaj Rusisë përbën dëshminë e aleancës sonë dhe dallimin me ata që nuk u rreshtuan në anën e së vërtetës”, ka vijuar Kurti.
Ai ka përmendur se ka pasur një bisedë të frytshme javën e kaluar me shefin e Diplomacisë Amerikane, Antony Blinken.
Ndër të tjera, shefi i ekzekutivit ka përmendur edhe takimet e rregullta që ka me ambasadorin amerikan, Jeffrey Hovenier.
Ndërkaq, emisari amerikan, Escobar ka thënë se është një partneritet i palëkundur ndërmjet ShBA-së dhe Kosovës.
Ai ka thënë se është diskutuar për implikimet rajonale nga dialogu, për pavarësinë dhe sigurinë e rajonit si dhe rëndësinë e rreshtimit të Kosovës përkrah vlerave evropiane.
“Ju e thatë saktë dhe ky është një partneritet i palëkundshëm në mes të ShBA-së dhe Kosovës. Ne e folëm edhe çështjen e dialogut me Serbinë. Pata deshirë të theksoj sërish se faleminderit për miqësinë, partneritetin dhe bashkëpunimin”, ka thënë Escobar.
Ai sërish theksoi mbështetjen e tij për aspiratat euroatlantike të Kosovës.