I dërguari i Posaçëm i Shteteve të Bashkuara të Amerikës për Ballkanin Perëndimor, Gabriel Escobar, e ka ritheksuar qëndrimin e ShBA-së, se e përkrah punën e Gjykatës Speciale.
Escobar ka thënë se krimet luftës në vitet ’90-ta duhet të trajtohen nga autoritetet vendase, teksa e ka theksuar nevojën për Gjykatën Speciale.
“Ne e përkrahim punën e Speciales. Unë besoj se çdoherë e më shumë krimet e kryera në vitet ’90 duhet të trajtohen nga autoritetet vendëse, në mënyrë të drejtë dhe proces të duhur. Por, besoj se ende ka nevojë për Gjykatën Speciale dhe mekanizmat që e përkrahin këtë organizëm. Prandaj, po e përkrahim Gjykatën Speciale”, ka thënë Escobar.
Ndërkaq, Kryeministri i Shqipërisë, Edi Rama, ka bërë të ditur se ka firmosur një letër drejtuar kryeministrave dhe presidentëve të të gjitha vendeve anëtare të Këshillit të Evropës, në përpjekje për të nisur një raport vijues kundër raportit të Dick Martyt.