Policia e Kosovës ka njoftuar se të enjten e 20 tetorit, Drejtoria Rajonale e Policisë në Gjilan, përkatësisht Njësiti Reagues i Stacionit Policor në Kllokot, ka ndalur për një kontroll rutinë një automjet me targa vendore, në të cilin kanë qenë dy të dyshuarit kosovarë shqiptarë të mitur A.A. (2007) dhe S.H. (2006).
Policia njofton se patrullimi është bërë në fshatin Mogillë, në komunën e Gjilanit.
“Gjatë kontrollit në bagazhin e automjetit të lartcekur zyrtarët policorë kanë gjetur dy (2) armë automatike AK-47 me karikator përkatës të cilët janë konfiskuar si dëshmi për Gjykatën”, njofton Policia e Kosovës.
Tutje, policia njofton se pas arrestimit të të dyshuarve ata janë intervistuar në bazë të procedurave ligjore.
Në lidhje me rastin është njoftuar prokurori i shtetit, i cili ka urdhëruar që ndaj të dyshuarve të ngritet kallëzim penal për veprat penale ‘’Mbajtje në pronësi, kontroll ose posedim të paautorizuar të armëve’’ dhe rasti të procedohet në procedurë të rregullt në prokurori.