Ish-ministrja e Arsimit, Hykmete Bajrami, ka thënë se kryeministri Kurti duhet t’i kërkojë përgjegjësi ministres Nagavci, për dështimin e zëvendësimit të orëve mësimore, dy të shtuna radhazi.
Përmes një postimi në Facebook, Bajrami ka thënë se ministrja e Arsimit, Arbërie Nagavci, është përgjegjëse pse dështoi edhe këtë të shtunë zëvendësimi i orëve mësimore. Ndërsa, sipas saj, kryepërgjegjësi është kryeministri Kurti, “i cili po e toleron një ministre të tallet me mijëra fëmijë e familje”.
“Kryeministri duhet t’i kërkojë ministres Nagavci që të arrijë sa më shpejt marrëveshje me prindërit, për zëvendësimin e orëve të humbura shkaku i grevës. Nëse dështon edhe të shtunën e ardhshme zëvendësimi i orëve mësimore, atëherë ministres së Arsimit duhet t’i kërkohet përgjegjësi dhe të shkarkohet menjëherë”, thuhet në postimin e ish-ministres së Arsimit.
Tutje, në këtë postim thuhet se partia në pushtet ka ardhur në Qeveri për t’i zgjidhur të gjitha ”çështjet kombëtare e ndërkombëtare”, por sipas Bajramit, kjo Qeveri po dështon në ekonomi, shëndetësi, diplomaci e më së shumti po dështon në arsim.