Zëdhënësja e Lidhjes Demokratike të Kosovës (LDK), Sibel Halimi ka reaguar rreth posterave të vendosur në rrugët e qytetit të infermieres, Aulona Pelaj.
Ajo këtë e ka cilësuar si linçim publik dhe si i tillë është i papranueshëm në një rend demokratik.
Halimi ka thënë se në vende ku prokuroria, gjyqësori dhe sundimi i ligjit funksionojnë, forma të tilla si vendosa e posterave si në këtë rast, sipas saj mund të shndërrohen në inspirim për kulturën e dhunës dhe mentalitetit diskriminues.
“Linçimi publik është i papranueshëm në një rend demokratik. Në vende të tilla ku funksionon prokuroria, gjyqësori dhe sundimi i ligjit, forma të tilla të satanizmit publik dhe të hapur ndaj çdo kujt, pavarësisht veprimeve të tij, shndërrohen në inspirim për kulturën e dhunës dhe mentalitetit diskriminues”, ka shkruar Halimi.
Zëdhënësja e LDK-së ka thënë se një padrejtësi nuk mund të korrigjohet me një padrejtësi tjetër, por sipas saj “përkundrazi, në këtë mënyrë vetëm sa thellohet qarku vicioz i urrejtjes, shtypjes, dhunimit dhe padrejtësive tjera shoqërore edhe më të mëdha”.
Ajo e ka përfunduar postimin duke thënë se “Fushata të tilla nuk kanë të bëjnë fare me restaurimin e drejtësisë”.