Ministri i Mbrojtjes, Armend Mehaj, ka pritur në takim ambasadorin jorezident të Luksemburgut në Kosovë, Eric Dietz, të martën e tetë nëntorit.
Në takimin mes tyre, Mehaj njoftoi ambasadorin Dietz lidhur me angazhimin në avancimin dhe ngritjen e Ministrisë së Mbrojtjes dhe FSK-së, sipas standardeve të vendeve të NATO-s, procesin e realizimit të Planit dhjetëvjeçar të Tranzicionit të FSK-së.
Ministri Mehaj dhe ambasadori Dietz kanë diskutuar dhe rreth stërvitjeve shumëkombëshe, pjesëmarrjes në operacionet paqeruajtëse dhe ato humanitare, si dhe gatishmërisë për ofrimin e kontributit në shërbim të paqes sigurisë dhe stabilitetit me partnerët ndërkombëtarë.
“Në këtë takim me Ambasadorin Dietz biseduam edhe lidhur me bashkëpunimin e deritashëm në mes të të dy vendeve duke u dakorduar për identifikimin e mundësive të zgjerimit të këtij bashkëpunimi në fushën e mbrojtjes dhe sigurisë, e që do të mund të konkretizohej nëpërmjet nënshkrimit të një marrëveshjeje bilaterale të bashkëpunimit”, ka shkruar Mehaj në Facebook.