Presidenti i Serbisë, Aleksandër Vuçiq, të mërkurën e 9 nëntorit do të zhvillojë një takim me ish-drejtorin Rajonal të Policisë në Mitrovicë të Veriut, Nenad Gjuriq dhe ish-shefin e Drejtorisë së Policisë Rajonale të Mitrovicës Veriore, Aleksandër Filipoviq.
Presidenti serb, Vuçiq do t’i dhurojë Gjuriq-it “Urdhrin e Meritës së Klasit të Parë për Mbrojtje dhe Siguri”, nderim ky i cili jepet për kryerjen shembullore të detyrave në fushën e mbrojtjes dhe sigurisë. Mirëpo, Gjuriq nuk do të jetë i vetmi që do t’i jepet medalje. Krahas tij, Filipoviq-it do t’i dhurohet “Medaljen e Artë për Guxim”.
Të mërkurën e 9 nëntorit, Vuçiq pritet t’i dhurojë Gjuriqit dhe Filipoviqit vlerësimet e lartcekura, raporton Nevosti.rs.
Një veprim i tillë vjen pas suspendimit të Gjuriqit nga posti i tij dhe njëherit, bojkotimit të institucioneve të Republikës së Kosovës nga serbët pas refuzimit të Qeverisë së Kosovës për ta ndryshuar vendimin rreth riregjistrimit të automjeteve me targa RKS.
Inspektorati Policor i Kosovës rekomandoi javën e kaluar suspendimin nga puna të ish-drejtorit të Policisë së Kosovës për rajonin e veriut, Nenad Gjuriq, ngase i njëjti dyshohej se kishte bërë thirrje për rezistencë kur tha se policët në veri të Kosovës nuk do të zbatojnë vendimin e Qeverisë lidhur me targat.