Vendimi për Rregullimin e Çmimeve të Produkteve të Naftës dhe Karburanteve të Ripërtërishme dhe Masat e Tjera Mbrojtëse ka skaduar më datën 8 tetor të këtij viti, ka njoftuar MINT.
Ministria e Industrisë, Ndërmarrësisë dhe Tregtisë ka njoftuar se në bazë të evidencave dhe analizave të Doganës së Kosovës dhe njëherit, në bashkëpunim me Inspektoratin e Tregut dhe Departamentin e Naftës (MINT), çmimi i derivateve në treg ditën e sotme ka rrjedhur si rezultat i rritjes së çmimit të derivateve të importuara.
Tashmë, MINT pritet të nxjerrë vendim për rregullimin e çmimeve dhe masat e tjera mbrojtëse.
“Në rast të rritjes së paarsyeshme të çmimeve të derivateve të naftës, Ministria e Industrisë, Ndërmarrësisë dhe Tregtisë do të nxjerrë vendim për rregullimin e çmimeve dhe masat e tjera mbrojtëse, sipas Udhëzimit Administrativ për Rregullimin e Çmimeve të Produkteve të Naftës dhe Karburanteve të Ripërtërishme dhe Masat e Tjera Mbrojtëse dhe me evidencë nga raportet ditore nga Inspektorati i Tregut, Dogana e Kosovës, Administrata Tatimore e Kosovës, si dhe në konsultim me Autoritetin e Konkurrencës, Shoqatën e Naftëtarëve dhe bizneset individuale të naftës dhe konsumatorët”, ka njoftuar MINT.
MINT deri para pak ditësh ka publikuar çmimet tavan apo ato maksimale të lejuara për shitjen e derivateve. Një vendim i tillë ishte marrë si masë lehtësuese, pas rritjes së çmimeve të derivateve dhe dyshimeve për keqpërdorime nga kompanitë që i shesin ato.