Shfaqja “Peizazh koreografik” retrospektivë 50-vjeçare e koreografit Xhemali Berisha është mbajtur të mërkurën e 9 nëntorit në Sallën e Kuqe të Pallatit të Rinisë.
Me anë të kësaj ngjarje është vlerësuar lartë kontributi i Berishës në fushën e koreografisë duke theksuar se vlerat e kësaj trashëgimie i ka prezantuar më së miri në skenat dhe festivalet me renome ndërkombëtare.
Që nga fillimi i punës si koerograf, Xhemali Berisha, ka hulumtuar të gjitha zonat korologjike të Kosovës dhe për dhjetë vite ai ka arritur të sjell dhe të përpunojë materiale nga Opoja, Hasi, Rugova, Anadrinia, Drenica dhe Anamorava.
Ministri i Kulturës, Rinisë dhe Sportit, Hajrullah Çeku ka vlerësuar kontributin e jashtëzakonshëm që ka dhënë Xhemali Berisha në karrierën e tij 50-vjeçare në sferën e koreografisë, duke thënë se vallet me koreografi të tij origjinale të panumërta janë pasuri të pashlyeshme të folklorit të Kosovës.
Ndërkaq koreografi Xhemali Berisha ka theksuar se artistët e Ansamblit “Shota” në të gjitha rrugëtimet e tyre në festivale ballkanike, evropiane e botërore i kanë sjell medalje Kosovës.