Të mërkurën e 16 nëntorit, një person ka mbetur i plagosur në Gjakovë, si pasojë e shkrepjes së armës nga i dyshuari i cili ende nuk është arritur të arrestohet.
Kështu ka bërë të ditur për Portalin Dukagjini, zëdhënësi i policisë për rajonin e Gjakovës, Sheremet Elezaj, i cili ka theksuar se i dyshuari ndonëse nuk është arrestuar ende, i njëjti është identifikuar tashmë.
“Mbrëmë viktima mashkull i moshës madhore është paraqitur në Stacionin Policor-Gjakovë dhe ka raportuar se rreth orës 21:40, si pasojë e shkrepjes së armës nga i dyshuar, ka marrë plagë në këmbë (plagë të lehtë). I dyshuari (po ashtu i moshës madhore) është identifikuar, mirëpo deri më tani nuk është arritur të arrestohet”, ka thënë Elezaj.
Sipas tij, në koordinim me Prokurorin e Shtetit është iniciuar rasti “Përdorim i armës apo mjetit të rrezikshëm” dhe “Shkaktim i rrezikut të përgjithshëm”.
Rasti vazhdon me hetime, ka shtuar Elezaj.