Ngjarjet e fundit në veri nuk janë duke i konvenuar presidentit të Serbisë, Aleksandar Vuçiq, ka thënë analisti Imer Mushkolaj, në emisionin “Debat Plus” në RTV Dukagjini.
Ai ka shtuar se, ngjarje të tilla i konvenojnë vetëm elementeve proruse në Serbi.
“Nuk besoj se në këtë kohë këto ngjarje i konvenojnë Vuçiqit. Më tepër besoj se ngjarjet u konvenojnë grupeve serbe me sentiment prorus në Serbi. Rusia kohëve të fundit nuk është shprehur e kënaqur me Serbinë’’.
“Vetë zyrtarët rusë pozicionin e Serbisë e kanë konsideruar neutral për krizën në Ukrainë. Sot për sot, Beogradit nuk i konvenojnë trazirat në veri të Kosovës. Kur i kanë konvenuar, ai ka shkaktuar trazira siç ishte bllokimi i veriut të Kosovës para disa muajve”, ka thënë ai.
Sipas Mushkolajt, Serbia mund të ndryshojë qasje nëse nuk arrihet ndonjë marrëveshje për targa deri në fund të javës. Andaj Kosova duhet të jetë e kujdesshme gjatë kësaj kohe, pasi Vuçiq, së fundi, e “ka paraqitur veten te ndërkombëtarët si paqësor, derisa Kosovën dhe Kurti si iniciues të incidenteve të ndryshme”.