Zëvendëskryeministri italian, Antonio Tajani bashkë me ministrin e Mbrojtjes, Guido Crosetto, kanë mbërritur në Aeroportin Ndërkombëtar të Prishtinës “Adem Jashari”.
Ata u pritën nga ministrja e Punëve të Jashtme, Donikë Gërvalla.
Zëvendëskryeministrja Donika Gërvalla dhe zëvendëskryeministri dhe ministrin i Punëve të Jashtme dhe Bashkëpunimit Ndërkombëtar të Italisë, Antonio Tajani, do të mbajnë një konferencë të përbashkët për media e cila është paraparë të zhvillohet rreth orës 16:15.
Edhe ministri i Mbrojtjes së Italisë, do të zhvillojë takim me homologun e tij nga Kosova, Armend Mehaj, ku pas takimit do të ketë konferencë për media.
Ndërkaq, në kuadër të vizitës së tij, Tajani dhe Crosetto do të takohen edhe me presidenten e Kosovës, Vjosa Osmani dhe kryeministrin Albin Kurti.
Ndryshe, ministri Tajani në Twitter ka shkruar se Italia dëshiron të jetë protagoniste e paqes në Ballkanin Perëndimor.
Ai ka njoftuar se do ta vizitojnë edhe Beogradin.
“Sot në mision të përbashkët me Ministrin e Mbrojtjes Guido Crosetto në Serbi e Kosovë. Po punojmë për të ulur tensionin mes dy vendeve, edhe falë pranisë së kontingjentit tonë ushtarak. Italia gjithashtu dëshiron të jetë protagoniste e paqes në Ballkanin Perëndimor”, shkruan ai.