Ministrja e Industrisë, Ndërmarrësisë dhe Tregtisë, Rozeta Hajdari, ka thënë se rezerva shtetërore është rritur shumëfish më shumë për vitin 2023 krahasuar me vitet paraprake.
Kështu është shprehur ajo, gjatë raportimit të saj në Komisionin Parlamentar për Ekonomi.
Sipas ministres së këtij dikasteri, kjo rezervë do të jetë në vlerë 15 milionë euro.
“Jemi të kënaqur me buxhetin. Për shtatë sektorët industrialë, e rëndësishme është që të përkrahen për vitin e ardhshëm”, tha ajo.
Ajo, ndër të tjera, ka thënë se Ministra e Industrisë, Ndërmarrësisë dhe Tregtisë (MINT), ka planifikuar që në vitin 2023 të emërojë shtatë atashe ekonomike.
Ministrja Hajdari ka potencuar se diplomacia ekonomike do të jetë prioritet për vitin e ardhshëm.
Kjo, sipas Hajdarit, ka për qëllim promovimin dhe nxitjen e investimeve në Kosovë.
Sipas ministres, Kosova duhet të ketë rezerva të naftës.
Ministrja e këtij dikasteri, ka thënë se ky mund të jetë kusht për anëtarësim në BE.
“Kroacia ka pasur problem për anëtarësim në BE, edhe Kosova mund të hasë një problem te tillë për anëtarësim në BE dhe ky mund të jetë kusht edhe për Kosovën”, shtoi ajo.