Shqyrtimi gjyqësor në rastin ku kryetari i Kuvendit të Kosovës, Glauk Konjufca, akuzohet për hedhje të gazit lotsjellës në kuvend, më 2016, është anuluar.
Në mesin e seancave të anuluara në Gjykatën Themelore në Prishtinë, ishte edhe ajo në rastin ku ish-sekretari i Ministrisë së Infrastrukturës (MI), Betim Reçica dhe tre zyrtarët e tjerë, Isa Berisha, Leonora Limani dhe Mirdit Emini, po akuzohen për keqpërdorime në tenderin për autostradën e Gjilanit, shkruan BetimipërDrejtësi.
Anulimi i tyre vjen pas vendimit të Këshillit Gjyqësor të Kosovës (KGJK), që puna e gjykatës të bëhet vetëm me shërbime esenciale, pas vendimit të Qeverisë së Kosovës për uljen e pagave të gjyqtarëve dhe prokurorëve.
Në mbledhjen e 299-të të Këshillit Gjyqësor të Kosovës (KGJK), më 24 nëntor, është miratuar lista me shërbimet esenciale, me të cilat, do të punojnë tani e tutje gjykatat, deri në një vendim të radhës të Këshillit.
Ndryshe, kryesuesi i Këshillit Gjyqësor të Kosovës (KGJK), Albert Zogaj, në një konferencë për media më 23 nëntor, ka kërkuar nga Qeveria e Kosovës që të anulojë vendimi, me të cilin, u ulen pagat gjyqtarëve dhe prokurorëve.
Zogaj tha se kanë marrë vendim, përmes të cilit, puna e gjykatave reduktohet dhe do të punohet vetëm me shërbime esenciale.
Po ashtu, edhe Këshilli Prokurorial i Kosovës (KPK), mori vendim, me të cilin, reduktohet puna e Prokurorive dhe punohet vetëm me staf esencial.
Si KGJK, ashtu edhe KPK, kanë njoftuar se nëse Qeveria nuk e anulon vendimin deri më 8 dhjetor, do të marrin masa të tjera.
Vendimi i KGJK-së dhe KPK-së erdhi pas vendimit të Qeverisë, ku gjykatësve dhe prokurorëve u ulen pagat.