Pas njoftimit nga ministrja e Drejtësisë, Albulena Haxhiu, e cila deklaroi se janë zhdukur mostrat e Astrit Deharit nga laboratori i toksikologjisë, ka reaguar deputetja e AAK-së, Time Kadrijaj, duke thënë se LVV-ja ka bërë propaganda për këtë rast.
Kadrijaj tha se partia në pushtet, e ka shfrytëzuar emrin e Astrit Deharit, si mjet për të ardhur në pushtet.
“Papërgjegjësia e kësaj Qeverie po i kushton Republikës. Kauzat e VV-së në emër të Deharit, sot treguan që kanë qenë propagandë dhe mjet për të arsyetu ardhjen në pushtet. Ministria e Drejtësisë edhe sot zgjodhi konferencat inepte për të na shitur mjegull dhe për të shfrytëzuar tragjeditë”, ka thënë ajo.
Ajo u shpreh se LVV, nuk e ka bërë asnjë veprim konkret për ta zbardhur rastin e Astrit Deharit.
“Asnjë hap, asnjë veprim, asnjë gjë konkrete nuk bënë që ta mbajnë premtimin për Astritin. Vetëm zhurmë e fajësime për dramë politike mbi tragjedinë e Astritit. Tash kanë zgjedhur që edhe njëherë të jehojnë paaftësinë e tyre duke kërkuar fajtor për shfajësim”, ka thënë ajo.
Në fund ajo ka shkruar: “Mbrëmë u shkel Astriti, edhe njëherë!”.