Kryeminstri i Kosovës, Albin Kurti ka bërë të ditur se në mbledhjen e Qeverisë së Kosovës që është mbajtur të martën janë marrë 31 vendime.
Në këtë mbledhje, shefi i ekzekutivit ka thënë se janë miratuar gjashtë nisma për marrëveshje ndërkombëtare për projekte në infrastrukturë, drejtësi e energji.
Po ashtu që çmimi i energjisë elektrike për qytetarët të jetë më i përballueshëm, Kurti ka thënë se qeveria ka ndarë mjete për subvencionimin e tarifave të energjisë elektrike.
“Ndamë mjete për masat e Pakos për Përballje me Inflacion, në mbështetje të amvisërisë që kanë kursyer energji, për punëtorët e ndërmarrjeve publike, për punëtorët e sektorit publik dhe për studentët”, ka shkruar Kurti në Facebook.
Po ashtu në këtë mbledhje është aprovuar Plani i Veprimit për pakon e përkrahjes buxhetore për krizën e energjisë brenda fondeve IPA 2023, me vlerë prej 75 milionë euro.
“Iniciuam përfshirjen e Konventës së Kombeve të Bashkuara për të Drejtat e Personave me Aftësi të Kufizuara në listën e instrumenteve ndërkombëtare në Kushtetutën e Republikës”.
Ndërsa për fushën e bujqësisë është miratuar kompensimi i dëmeve të shkaktuara në komunat e prekura nga fatkeqësitë natyrore.
Në mesin e shumë pikave, është miratuar edhe Plani Kombëtar i Veprimit 2023-2025 për Partneritetin për Qeverisje të Hapur.
“Me qëllim të institucionalizimit të kujdesit shëndetësor për pacientët me sëmundje të rralla, miratuam Koncept Dokumentin për Sëmundjet e Rralla. Miratuam edhe Projektligjin për parandalimin dhe kontrollin e sëmundjeve ngjitëse”.
“Themeluam Këshillin Shtetëror Organizativ për shënimin e 15 vjetorit të Pavarësisë së Republikës së Kosovës dhe 25 vjetorit te Epopesë së Ushtrisë Çlirimtare të Kosovës”.
Kreu i Qeverisë ka bërë të ditur se janë miratuar tri vendime për shpronësim për interes publik për realizimin e projekteve infrastrukturore në komunat e Mitrovicës dhe Podujevës dhe se janë ndarë mjete për subvencionim të ndërtimit të shtëpive për komunitetet jo-shumicë, ndërtimi i të cilave kishte filluar në vitin 2019.