Mëngjesin e hershëm të 3 janarit, është arrestuar edhe një i dyshuar lidhur me rastin e vrasjes në Prizren, vepër për të cilën, i dyshuari kryesor ishte Dibran Hoxha.
Raporti 24-orësh i Policisë së Kosovës bën të ditur se i dyshuari është dërguar në mbajtje.
“Rr. Tahir Sinan, Prizren 03.01.2023 – 04:00. Lidhur me rastin, është arrestuar edhe një i dyshuar, mashkull kosovar. Me vendim të prokurorit, i dyshuari është dërguar në mbajtje”, thuhet në raport.
Më 3 janar, një 31-vjeçar nga Kukësi ka humbur jetën, ndërsa një tjetër është plagosur pas një përleshjeje në një lokal nate në komunën e Prizrenit.
Lidhur me rastin, Gjykata Themelore në Prizren ka caktuar masën e paraburgimit në kohëzgjatje prej një muaji, për Dibran Hoxhaj, Arben Vezaj, Burim Mazreku, Jesmir Badalli, Kujtim Gashi dhe Enver Amrallahi, kohë e cila do të llogaritet prej momentit të arrestimit 03.01.2022, dhe mund të zgjasë deri më datën 03.02.2023 ndaj të pandehurve.
Gjykata në fjalë ka marrë parasysh faktin se me lënien në liri, të pandehurit mund të fshihen apo të arratisen, me qëllim të shmangies nga përgjegjësia penale, duke cilësuar paraburgimin si një masë të domosdoshme dhe të arsyeshme.
Pronari i lokalit “Kobra City”, Dibran Hoxha, i cili është i dyshuari kryesor për vrasjen e 31- vjeçarit nga Kukësi i Shqipërisë, është emër i njohur për organet e drejtësisë në Kosovë.