Kryeministri i Kosovës, Albin Kurti, ka takuar 12 gazetarët ukrainas që po banojnë në kryeqytetin e vendit, në kuadër të programit të mbështetur dhe financuar nga Qeveria e Republikës së Kosovës, Journalists-in-Residence (JiR Kosovo).
“Ai u uroi mirëseardhje në Zyrën e Kryeministrit Lyudmilas, Serhit, Marinas, Victoriias, Lyudmilas, Irynaas, Oksanas, Katerynas, Lyudmilas, Olgas, Anastasiias dhe Olenas dhe vajzës së saj gjashtë vjeçare që së fundmi i është bashkuar në Prishtinë”, njofton Zyra e Kryeministrisë.
Kurti ka thënë se “Është nder dhe kënaqësi e veçantë të ju takoj në këtë ditë feste dhe pushimi”.
Kryeministri Kurti ka falënderuar për qëndresën në Ukrainë, ku bëhet e ditur se partnerët e dy gazetareve janë në front të luftës, si dhe për punën e tyre në Kosovë nëpërmjet artikujve të ndryshëm gazetaresk.
“Gazetarët shprehën mirënjohjen e tyre të thellë për mbështetjen dhe mikpritjen e ngrohtë që u ka ofruar Kosova dhe populli i saj. Kjo i ka bërë të ndjehen si në shtëpi në këto kohë të vështira për ta, popullin dhe vendin e tyre. Ata ndanë me kryeministrin nga përvojat e tyre në Kosovë dhe angazhimet profesionale”, thuhej tutje në njoftimin e Kryeministrisë.
Tutje kreu i ekzekutivit u ka uruar Krishtlindjet Ortodokse gazetarëve ukrainas me besim ortodoks, të cilët festojnë dhe në këtë të shtunë.
Mes tjerash njoftohet se Krishtlindja Ortodokse këtë vit për herë të parë po shënohet në dy data, me 25 dhjetor dhe 7 janar, me vendim të Kishës Ortodokse të Ukrainës (OCU) pas invazionit të paprovokuar të Federatës Ruse mbi Ukrainën.
Në takimin e kryeministrit Kurti me gazetarëtarët ukrainasë ishin të pranishëm edhe përfaqësues të Asociacionit të Gazetarëve të Kosovës, zbatues të programit JiR, dhe Qendrës Evropiane për Liri të Shtypit dhe Medies (ECPMF).