Kryetari i kuvendit të Kosovës, Glauk Konjufca, pas vdekjes së akademikes Edi Shukriu, ka thënë se ajo la gjurmë të pashlyeshme në fushën e shkencës, letërsisë, historisë, arkeologjisë, kulturës dhe mendimit politik.
Me anë të një postimi në llogarinë e tij në Facebook, Konjufca ka shprehur ngushëllime për vdekjen e akademikes Edi Shukriu, duke thënë se ajo dha një kontribut të pazëvëndësueshëm në pavarësinë dhe zhvillimin e shtetit të Kosovës.
“Me pikëllim të thellë e mora lajmin për vdekjen e intelektuales, arkeologes sonë të shquar, shkrimtares dhe ish-deputetes, Edi Shukriu. Ajo dha kontribut të pazëvendësueshëm në pavarësinë dhe zhvillimin e shtetit të Kosovës. Akademikja Shukriu njëkohësisht ishte shembulli i gjallë i gruas së angazhuar e aktiviste me pjesëmarrjen e saj në proceset kyçe, nëpër të cilat, kaloi populli dhe shoqëria jonë”, shkroi Konjufca.
“Trashëgimia që e la pas, mbetet për t’u studiuar e kujtuar. Ngushëllimet e mia më të sinqerta për familjen e saj, bashkëpunëtorët, për Akademinë e Shkencave dhe të Arteve të Kosovës dhe mbarë kombin shqiptar”, shtoi ai.
Të martën, ka vdekur në moshën 73-vjeçare akademikja kosovare, Edi Shukriu.
Lajmin për vdekjen e saj e ka dhënë Akademia e Shkencave dhe e Arteve e Kosovës (ASHAK).
“Me dhembje dhe pikëllim të thellë njoftojmë opinionin se më 17 janar 2023 ndërroi jetë akademike Edi Shukriu, një emër i njohur dhe i çmuar në fushën e arkeologjisë, të historisë, të letërsisë, të angazhimeve politike, institucionale dhe kulturore në Kosovë dhe në mbarë hapësirën shqiptare”, thuhet në njoftimin e faqes së ASHAK.
Varrimi i së ndjerës do të bëhet më 18 janar 2023, ora 15:00, në varrezat katolike të qytetit të Prizrenit.
Mbledhja komemorative do të mbahet në mjediset e ASHAK-ut në orën 11:00.