Iniciativës për bojkotimin e produkteve serbe, i është bashkuar edhe Getoar Shehu, pronar i njërit prej lokaleve të gastronomisë në fshatin Krushë e Vogël e Prizrenit.
Shehu, i cili gjatë luftës ia vranë babain dhe mbi 30 antarë të familjes, thotë se i është gëzuar kësaj iniciative dhe se sipas tij ajo duhet të vazhdoj edhe më tutje.
Getoar Shehu, pronar i lokalit GEG ka thënë se “Kemi vendos që në përkrahje të fushatës por dhe si obligim qytetar, obligim moral ndaj shumë sakrificave, e kam ndjer dhe e ndjej se duhet të jetë obligim për gjithësecilin që të paktën një ndihmë të mos ia japin shtetit serb”.
Ai përmend edhe vështirësitë që has për tu furnizuar nga shtetet e tjera, por që pavarësisht kësaj ai shprehet i bindur se nuk do u shërbejë klientëve të tij produkte nga Serbia.
Shehu ka shtuar se emocionet janë të pashmangshme tek flet për periudhën e luftës në Kosovës, derisa atë e përmbledh me një thënie të Albert Ajnshtajnit.
Në përkrahje të iniciativës për të bojkotuar produktet serbe, fushatë e cila nisi pas tensioneve në veri, janë edhe banorët e tjerë të fshatit, të cilët kërkojnë edhe përkrahjen e institucioneve për këtë.
Muharrem Asllani, banor i Krushës së Vogël ka thënë se “Është shenjë shumë e mirë e patriotizmit dhe me këtë fushatë sadopak mund t’i nderojmë ata që ranë për lirinë e Kosovës dhe për shtetin tonë”.
Iniciativa “Mos bli prodhime serbe”, mori hov pas barrikadave të vendosura në komunat veriore të Kosovës, në fundvitin e kaluar si shenjë pakënaqësie ndaj arrestimit të një ish- zyrtarit policor.
Aktive në rrjetin social Facebook, kjo iniciativë tashmë ka gjetur përkrahjen e shumë bizneseve, që kanë larguar produktet serbe.