Qeveria e Kosovës në mbledhjen e 121-të të mbajtur të mërkurën ka miratuar Projektligjin për Liritë Fetare.
Ky projektligj ka kaluar me shumicë votash, ndërsa tre anëtarë të kabinetit abstenuan.
Kryeministri i Kosovës, Albin Kurti ka thënë se një ndër qëllimet më të rëndësishme të projektligjit është të ruajë pluralizmin fetar e t’u ofrojë bashkësive fetare mundësinë për t’u regjistruar zyrtarisht.
“Mendimet dhe besimet e ndryshme vazhdimisht po hyjnë e qarkullojnë lirshëm midis qytetarëve tanë. Pluralizmi i besimit, siç e kanë vërejtur shumë filozofë është një fakt i pandryshueshëm i një shoqërie demokratike. Projektligji në fjalë, do t’iu ofrojë bashkësive të ndryshme fetare mundësinë për tu regjistruar zyrtarisht”, ka thënë Kurti.
Ndryshe, të hënën e 23 janarit, Kryetari i Bashkësisë Islame të Kosovës, myftiu Naim Tërnava, ka pritur në takim kryeministrin Kurti, me të cilin kanë diskutuar për Projektligjin për Liritë Fetare.
Në këtë takim ishte theksuar se Qeveria e merr me seriozitet garantimin dhe respektimin e plotë të lirisë fetare, në mënyrë të barabartë, për të gjithë qytetarët pa dallim.