Analisti Visar Ymeri, i ka krahasuar qëndrimet e Qeverisë së Kosovës, me qëndrimin e kryetarit të Lidhjes Demokratike të Kosovë(LDK), Lumir Abdixhiku, ku ka thënë se është për t’u vlerësuar qëndrimi i Abdixhikut pasi sipas Ymerit, kryetari i LDK-së ka qëndrime racionale.
Më tej, Ymeri ka thënë se për dallim nga pamaturia Qeverisë së Kosovës dhe kryeministrit Albin Kurti, qëndrimi i Abdixhikut është racional dhe se qëndrime të tilla i duhen Kosovës.
“Bashkë me debatin në Kuvend për dialogun, e plotësoi një pozicionim të qartë karshi dialogut dhe politikave të qeverisë në përgjithësi. Përballë paparashikueshmërisë dhe mungesës së maturisë që e kemi parë nga KM dhe Qeveria, qëndrimet e tilla racionale e të kujdesshme duken politika që po i mungojnë Republikës së Kosovës”, ka shkruar Ymeri në Facebook.
“LDK e Abdixhiku në anën tjetër po i rezistojnë me ngulm tundimit për të rrëshqitur në diskursin e gjithëpranishëm popullist, të premtimeve të bukura e zgjidhjeve të lehta e të shpejta”, ka shtuar ai.
Më tej, ai ka folur edhe për figurën e Kurtit si kryeministër, ku ka thënë se ai e ka glorifikur vetveten si i pakompromis.
“Natyrisht, për një kohë të shkurtër figura e ‘pakompromis’ që Kryeministri po do ta ndërtojë për vete edhe mund të duket i pëlqyeshëm e simpatik, Por jo kur rrezikon Kosovën, e veçanërisht jo kur dështon shpesh e shpejtë”, ka thënë ai.
“Në kohën kur një numër i madh i njerëzve po e kërkojnë gënjeshtrën e re, LDK e Abdixhiku po e thonë atë që ata e shohin si të vërtetë, të bëshme e të duhur për Kosovën. Kjo është për t’u vlerësuar”, ka përfunduar analisti Ymeri.