Presidentja e vendit, Vjosa Osmani, është pritur nga presidenti i Malit të Zi, Milo Gjukanoviq për vizitë zyrtare, të martën e 7 shkurtit.
“E ardhmja e vendeve tona është në Bashkimin Evropian dhe së bashku do të punojmë për të realizuar këtë synim të qartë”, ka shkruar Osmani.
Presidentja e vendit ka thënë se me presidentin Gjukanoviq kanë diskutuar për rëndësinë e koordinimit të përbashkët për ta forcuar partneritetin në mes të Kosovës dhe Malit të Zi, “si dhe fuqizimin e përpjekjeve tona kundër tendencave antidemokratike dhe destabilizuese në rajonin tonë”.
“Raportet në mes të vendeve tona janë të ndërtuara mbi frymën e respektit të ndërsjellë, bashkëpunimit dhe përkushtimit të dyanshëm për të ardhmen tonë euroatlantike”, ka shtuar presidentja Osmani.
Vizita e presidentes Osmani në Mal të Zi është njoftuar të hënën e 6 shkurtit nga Presidenca.
“Presidentja Vjosa Osmani me ftesë të homologut Milo Gjukanović, ka udhëtuar për vizitë zyrtare në Mal të Zi”, thuhej në njoftim.