Deputeti i Lëvizjes Vetëvendosje, Visar Korenica, ka thënë se ka shumë padrejtësi sa i përket dallimit mes pagave të sektorit publikë dhe atij privat.
Ai ka thënë se në Kuvendin e Kosovës, ka punëtorë të angazhuar nga kompani private që paguhen vetëm 220 euro.
Sipas tij Qeveria e Kovoës duhet të intervenojë sa më parë.
“Në këtë objekt të Kuvendit kemi punëtorë të angazhuar nga kompania private me pagë jo më të lartë se 220 euro. Pra, me pagë më të ulët se paga minimale që ka kaluar në lexim të parë. Një diferencë e tillë prej rreth 40% është një padrejtësi që kërkon vëmendje nga qeveria për ndërhyrje para se të bëhet shumë vonë. Nuk është kështu në gjithë botën”, shkroi Korenica.
Me 63 vota për Kuvendi i Kosovës i ka miratuar në lexim të dytë ndryshimet në Ligjin e Buxhetit për vitin 2023. Ky vendim i Kuvendit parasheh që koeficienti për pagat të jetë 105 euro, i cili ishte edhe propozim i Qeverisë së Kosovës.
Pagat e muajit shkurt, tashmë do të dalin duke u bazuar në Ligjin e ri të Pagave.