Dy organizata gjermane të ndihmës, të shtunën e 11 shkurtit, kanë pezulluar operacionet e shpëtimit në Turqinë e goditur nga tërmeti, duke përmendur problemet e sigurisë dhe raportet për përleshje midis grupeve të njerëzve dhe të shtëna me armë zjarri.
Kërkimi dhe shpëtimi ndërkombëtar gjerman (ISAR) dhe Agjencia Federale e Gjermanisë për Ndihmën Teknike (THW), thanë se do të rifillonin punën e tyre sapo agjencia turke e mbrojtjes civile AFAD ta klasifikojë situatën të sigurt.
Menaxheri i Operacioneve të ISAR, Steven Bayer, ka thënë se situata e sigurisë po përkeqësohej pak me kalimin e ditëve që nga fatkeqësia, dhe kjo ishte tipike në rrethana të tilla.
Para pezullimit të shpëtimit, Bayer kishte thënë për Reuters, se grupi do të qëndronte në kampin e përbashkët me THW për momentin, duke shtuar megjithatë se organizatat do të ishin menjëherë të gatshme për të ndihmuar nëse ka ndonjë indikacion për të mbijetuar.
Autoritetet turke nuk kanë raportuar për përplasje në rajonin e goditur nga tërmeti, por presidenti Tajip Erdogan komentoi situatën e përgjithshme të sigurisë të shtunën, duke vënë në dukje se ishte shpallur një gjendje e jashtëzakonshme dhe se kishte pasur disa grabitje.
Njësia e Ndihmës ndaj Fatkeqësive të Forcave Austriake (AFDRU) – gjithashtu ka pezulluar shkurtimisht operacionet të shtunën, dhe më pas zëdhënësi i Ministrisë së Mbrojtjes, Michael Bauer, kishte postuar në Twitter se ushtria turke kishte marrë përsipër mbrojtjen e kontigjentit AFDRU.
Rreth 82 punonjës shpëtimi nga forcat e armatosura të Austrisë kanë qenë në Antakya, Turqi që nga 7 shkurti, dhe specialistët e tyre kanë çliruar nëntë persona nga rrënojat.
Zvicra ka thënë se po monitoron nga afër situatën e sigurisë në Hatay dhe se masat e sigurisë janë shtuar në përputhje me rrethanat.
Zvicra ka dërguar 87 specialistë dhe 8 qen për të ndihmuar në operacionin e shpëtimit dhe deri më tani ka rikuperuar 11 persona, përfshirë dy foshnja që nga mbërritja të martën. Një ekip shtesë prej 12 vetash u dërgua të premten.