Policia e Kosovës ka zbuluar tre laboratorë droge në veri të Kosovës dhe ka arrestuar dy të dyshuar serbë.
Operacioni policor i koduar me emrin “Shpata” është realizuar në tri lokacione, gjatë këtij aksioni janë zbuluar dy laboratorë me rreth 1200 bimë narkotike, si dhe laboratori i tretë (pa bimë) me pajisje të sofistikuara për kultivim të bimëve narkotike në të.
“Policia e Kosovës me angazhime konkrete në parandalimin dhe luftimin e abuzimit me droga. Zbulohen tre laboratorë, arrestohen dy të dyshuar në veri të Mitrovicës. Policia e Kosovës, konkretisht Drejtoria për Hetimin e Trafikimit me Narkotikë siç jeni njoftuar më herët, sot më 12.02.2023, në rajonin e Mitrovicës veri, ka realizuar një operacion policor antidrogë, me mbështetjen edhe të njësive tjera relevante policore. Operacioni policor i koduar me emrin “Shpata” është realizuar në tri (3) lokacione. Gjatë realizimi të këtij operacioni antidrogë është arritur të zbulohen tre (3) laboratorë me bimë narkotike; dy laboratorë me rreth 1200 bimë narkotike, si dhe laboratori i tretë (pa bimë) me pajisje të sofistikuara për kultivim të bimëve narkotike në të”, thuhet në njoftimin e policisë.
Kurse, njësitet policore deri në këtë fazë kanë arritur të arrestojnë dy (2) persona të dyshuar meshkuj serbë, përderisa të gjitha veprimet e tjera policore në proces po ndërmerren dhe do të ndërmerren në bashkërendim me organet e drejtësisë.
“Policia mbetet fuqishëm e përkushtuar në luftimin e të gjitha aktiviteteve kriminale në vend, në veçanti luftë e pa kompromis do të zhvillohet ndaj personave apo grupeve kriminale që merren me abuzimin, posedimin, kultivimin apo trafikimin e substancave narkotike (drogave) në përgjithësi”, thuhet në njoftim.