Kryetari i Kuvendit të Kosovës, Glauk Konjufca, të hënën ka mirëpritur në takim një delegacion nga Shqipëria, në kuadër të Komisionit për Integrim Evropian, kryesuar nga Jorida Tabaku.
Në këtë takim është diskutuar për zhvillimet aktuale politike dhe çështje me interes të përbashkët, shkëmbimin e përvojave dhe intensifikimin e bashkëpunimit parlamentar.
Konjufca ka falënderuar deputetët e Kuvendit të Shqipërisë për angazhimin e tyre në mbështetje të Kosovës në të gjitha forumet dhe organizatat ndërkombëtare, si në afirmimin e subjektivitetit ndërkombëtar, ashtu edhe në atë të procesit të integrimit evropian.
“Mirënjohës dhe falënderues ndaj deputetëve të Kuvendit të Shqipërisë për mbështetjen e deritashme dhe bashkërendimin e hapave në të ardhmen drejt integrimeve evropiane dhe evroatlantike, si dhe anëtarësimin e shtetit të Kosovës në organizatat ndërkombëtare”, ka shkruar Konjufca në Facebook.
“Të unifikuar dhe koordinuar në rrugëtimin tonë gjeostrategjik kombëtar drejt BE-së, brenda NATO-s dhe në miqësi të përhershme me SHBA-në”, ka vijuar tutje.