Sekretari amerikan i Shtetit, Antony Blinken dhe presidenti serb, Aleksandar Vuçiq janë takuar në Konferencën e Sigurisë, e cila po mbahet në Mynih të Gjermanisë.
Zyrtari amerikan ka deklaruar se ka pasur një “bisedë produktive” me presidentin e Serbisë në Gjermani.
Kryediplomati amerikan nëpërmjet një postimi në rrjetin social, Twitter, ka thënë se gjatë takimit me presidentin serb është diskutuar rëndësia për normalizimin e marrëdhënieve mes Kosovës dhe Serbisë.
“Ne diskutuam rëndësinë e normalizimit të marrëdhënieve me Kosovën. Unë e vlerësojë mbështetjen e vazhdueshme të Serbisë për Ukrainën”, ka shkruar Blinken në Twitter.
Had a productive conversation with Serbian President @AVucic today at the @MunSecConf. We discussed the importance of normalized relations with Kosovo and I conveyed our appreciation for Serbia’s continued support for Ukraine. We share Serbia’s desire for a future with the EU. pic.twitter.com/9isoAics6N
— Secretary Antony Blinken (@SecBlinken) February 17, 2023
Kujtojmë se, gjatë ditës së 17 shkurtit për në këtë Konferencë ka udhëtuar edhe kryeministri i Kosovës, Albin Kurti, ku pritet të ketë takime të ndryshme me liderë botëror.
Vuçiq, i cili po merr pjesë në Konferencën e Sigurisë në Mynih, ka shkruar në profilin e tij në Instagram se në takim me Blinkenin, përveç se u diskutua për marrëdhëniet ndërmjet Beogradit dhe Prishtinës, u konfirmua edhe “përmirësimi e marrëdhënieve” mes vendeve.
Ndryshe, Kurti dhe Vuçiq pritet të takohen më 24 shkurt në Bruksel, ku do të diskutojnë rreth planit franko-gjerman, i cili parasheh normalizimin e marrëdhënieve mes Kosovës dhe Serbisë.