Përfaqësuesi i Lartë i BE-së për politikë të jashtme, Josep Borrell, në seancën e Këshillit të Sigurimit të OKB-së, ndër shumë tema, ka folur edhe për dialogun Kosovë – Serbi.
Borrell tha se dialogu ka hyrë në një fazë vendimtare, dhe se Bashkimi Evropian u ka paraqitur të dyja palëve propozimin për normalizimin e marrëdhënieve.
Ai u shpreh se pret nga Kosova dhe Serbia ta shfrytëzojnë mundësinë për marrëveshje, të cilën, ai e cilësoi si unike.
“Sesioni i sotëm i Këshillit të Sigurimit të OKB-së: Dialogu Beograd-Prishtinë i ndërmjetësuar nga BE-ja për normalizimin e marrëdhënieve është në një moment vendimtar. BE-ja u ka paraqitur palëve një propozim që do ta vendosë procesin e normalizimit në një rrugë solide dhe largpamëse. Unë do të pres të dyja palët në Bruksel javën e ardhshme dhe shpresoj që ata të angazhohen në mënyrë konstruktive dhe të shfrytëzojnë këtë mundësi unike”, ka thënë ai.
Kryeministri i Kosovës, Albin Kurti, do të takohet në Bruksel të hënën me presidentin e Serbisë, Aleksandër Vuçiq, në kuadër të dialogut Kosovë – Serbi të ndërmjetësuar nga Bashkimi Evropian.
Aty pritet të diskutohet për planin e propozuar nga BE-ja.