Qeveria e Kosovës në mbledhjen e 132-të ka vazhduar edhe për dy vjet mundësinë e aplikimit për njohje të statusit të viktimës së dhunës seksuale të luftës.
“Miratohet propozimi për shtyrjen e afatit të njohjes së statusit për viktimat e dhunës seksuale gjatë luftës, për statusin e dëshmorit, për veteranë, invalidë dhe viktima civile deri në vitin 2025”, ka thënë Kurti.
Kryeministri Albin Kurti u ka bërë thirrje viktimave të dhunës seksuale në luftë që të aplikojnë e të realizojnë të drejtën e tyre me ligj teksa ka theksuar se procesi i aplikimit është konfidencial.
“Të mbijetuarit e dhunës seksuale kanë nevojë për drejtësi e përkrahjen tonë shoqërore për ta luftuar stigmën me të cilën ende përballen”, ka vijuar ai.
Me rastin e 8 Marsit Kurti ka vlerësuar rolin e grave që kanë folur publikisht për dhunën seksuale që e kanë përjetuar gjatë luftës, ndërsa ka pasur fjalë edhe për kontributin e tyre në luftën çlirimtare dhe përgjatë gjithë historisë.