Kryeministri i Kosovës, Albin Kurti në adresimin e tij në mbledhjen e 132-të të Qeverisë i ka uruar 8 Marsin të gjitha grave.
Kreu i Qeverisë ka thënë se në këtë ditë nderohet kontributi i të gjitha grave që nuk janë më.
Sipas Kurtit, qeveria mbetet e përkushtuar ndaj politikave demokratike e sociale dhe sipas tij ka përpjekje e angazhime që prej shtëpisë e deri në institucione të bëhet Kosova sa më e barabartë.
“Në ditën ndërkombëtare të të gjitha grave nderojmë sukseset që ato i kanë arritur historikisht, sot e çdo ditë nderojmë kontributin e të gjitha grave që nuk janë më, luftojmë bashkë me gratë dhe vajzat. Qeverisja jonë mbetet e përkushtuar ndaj politikave demokratike e sociale që e lehtësojnë barrën e padrejtësisë që qëndron mbi supet e tyre, vazhdojmë përpjekjet dhe betejën për barazi shoqërore”, ka thënë Kurti.
Kurti ka vlerësuar rolin e grave që kanë folur publikisht për dhunën seksuale që e kanë përjetuar gjatë luftës, ndërsa ka pasur fjalë edhe për kontributin e tyre në luftën çlirimtare dhe përgjatë gjithë historisë.
Ai ka thënë se do të vazhdojnë të këmbëngulin që të mbijetuarave nga dhuna seksuale t’u njihet statusi, e që një gjë të tillë e ka konsideruar si proces të rëndësishëm për historinë dhe shtetin.
“Nderojmë e kujtojmë kontributin e grave në luftën çlirimtare dhe përgjatë gjithë historisë. Nuk harrojmë dhimbjen e madhe që nuk kalon dhe një plagë të madhe që shteti e ka obligim ta shërojë. Po e vazhdojmë procesin e aplikimit për njohjen e statusit të të mbijetuarave dhe të mbijetuarve të dhunës seksuale gjatë luftës. Një proces i rëndësishëm për historinë dhe shtetin tonë dhe një parakusht për ndërtimin e paqes në vend. Nderojmë rolin e të mbijetuarave që kanë folur publikisht për rastet e tyre, e veçanërisht Vasfije Krasniqin që është avokuese e zëshme në vendin tonë dhe ndërkombëtarisht”.
Kurti, ndër të tjera, ka treguar se në këtë mbledhje në rend dite si pikë e parë do të jetë Shqyrtimi i Propozim-vendimit për projektin Kompleksi “Adem Jashari” në Prekaz.
“Që prej themelimit të komunitet ndërministror, kemi ecur me hapa të sigurtë në mbrojtjen e vlerave. Aty e gjejmë lavdinë, forcën për nesër, me këtë projekt do ta jetësojmë këtë lavdi”.