“S’ka njohje, ka llafe”.
Kështu ka deklaruar kryetari i Partisë Socialdemokrate (PSD), Dardan Molliqaj.
Sipas tij, njohjes reciproke “Kurti ia pati shtuar edhe një fjalë që u pat përvetësuar prej opinionit: njohja reciproke në qendër”.
“Tash mungesës së njohjes Kurti po i përgjigjet me një tjetër akrobacion gjuhësor: nga mosnjohja e Kosovës nga Serbia, kemi kaluar në mosnjohje reciproke. Kemi përparuar sepse tash as ne nuk e njohim Serbinë. Ne nuk jemi në OKB dhe në shumë organizata tjera ndërkombëtare. Serbia është në të gjithat. Në Akordet e Evianit, është Franca që si kolonizatore heq dorë dhe e njeh Algjerinë, nuk flitet për njohjen e Francës nga Algjeria.”, ka shkruar Molliqaj në Facebook.
Sipas Molliqajt, Kurti ka vendosur ta rishpikë edhe reciprocitetin.
“Mosnjohje reciproke – ky na qenka reciprociteti, jo ai midis shqiptarëve të Luginës dhe serbëve të Kosovës, jo ai i mallrave, tregtisë dhe politikës”, ka vijuar ai.