Ish-kryeministri i Kosovës, Ramush Haradinaj, ka reaguar ndaj kryetarit të Pejës, Gazmend Muhaxhirit. Haradinaj ka thënë se kryetari i Pejës e ka akuzuar për demarkacionin me Malin e Zi.
“Paska folur Gazmend Muhaxheri edhe një herë për demarkacionin duke ma ngarkuar në qafë veç mua. Ani se populli thotë “gjuha prej tuli është”, zoti Muhaxheri duhet ta dijë se kur ta lënë “kopilin te dera”, duhet të merresh me të, e ai e di më mirë se kushdo tjetër se kush na e la kopilin e demarkacionit te dera”, ka shkruar në reagimin e tij Haradinaj.
Sipas ish-kryeministrit, ai kishte bërë aq sa kishte qenë e mundur për të ndrequr atë që ishte e pandershme. Më tej Haradinaj ka thënë se mirë është që kryetari i Pejës të flasë për ata që e kanë bërë asociacionin dhe demarkacionin.
“Unë dhe partia ime, duke qenë krejtësisht vetëm në këtë temë, kemi bërë aq sa ka qenë e mundur, duke e rikthyer demarkacionin në procedurë korrigjimi, kjo duke e siguruar edhe pajtimin e Malit të Zi. Mirë do të ishte të flasë për ata që e kanë gatuar edhe asociacionin edhe demarkacionin, e jo ta drejtojë gishtin nga ata që janë mundu ta ndreqin edhe të pandreqshmen!”, ka përfunduar ai.