Përfaqësuesi i posaçëm i Bashkimit Evropian për dialogun Kosovë-Serbi, Miroslav Lajçak, ka bërë të ditur se neni 7 i marrëveshjes në mes Kosovës dhe Serbisë nuk përfshin zotime të reja për Republikën e Kosovës.
Në një intervistë për REL, Lajçak ka thënë se ai nen përfshin atë për të cilën palët tashmë janë pajtuar.
“Dua të jem i qartë, neni 7 nuk përfshin zotime të reja për Kosovën. Neni 7 flet për nevojën e zbatimit të asaj për të cilën Kosova dhe Serbia veçse janë pajtuar. Kjo nënkupton marrëveshjet e viteve 2013 dhe 2015, që flasin që themelimin e njëlloj Asociacioni të Komunave me shumicë serbe. Përndryshe, kjo do të nënkuptonte nenin 10, që thotë se të gjitha marrëveshjet e mëparshme, plus nenin 7, pra aranzhime shtesë, që nuk do të kishte logjikë”, ka deklaruar ai.
I njëjti ka pohuar se kjo nënkupton formimin e Asociacionit të Komunave me shumicë serbe në Kosovë.
“Unë insistoj në atë që iu shërben të dyja palëve. Por, kjo është shumë e rëndësishme që të gjitha marrëveshjet paraprake duhet të zbatohen plotësisht. Pra, ne nuk mund të zgjedhim marrëveshjen që na pëlqen; cilën ta zbatojmë e cilën ta injorojmë, sepse procesi serioz do të shndërrohej në tallje”, ka deklaruar Lajçak.
Më 18 mars në Ohër, kryeministri i Kosovës, Albin Kurti dhe presidenti i Serbisë, Aleksandër Vuçiq, u pajtuan për ta zbatuar marrëveshjen e Bashkimit Evropian. Neni 7 i marrëveshjes kërkon nga Kosova dhe Serbia që të angazhohen “për të siguruar një nivel të duhur të vetëmenaxhimit për komunitetin serb në Kosovë”.