Presidentja e Kosovës, Vjosa Osmani, ka zhvilluar një takim me drejtorin në largim të ekipit këshillues dhe ndërlidhës të NATO-s, gjeneral brigade, Joachim Hoppe dhe drejtorin e ardhshëm të NALT-it, gjeneral brigade, Ralf Peter Hammerstein.
Siç ka njoftuar Zyra e Presidencës, gjatë takimit, Osmani ka diskutuar një varg temash me të dy gjeneralë brigadash, duke u fokusuar në rëndësinë e maksimizimit të të gjitha përpjekjeve për zhvillimin, trajnimin dhe dërgimin e misioneve jashtë vendit të FSK-së në përputhje me standardet e NATO-s, e me qëllim përfundimtar anëtarësimin në këtë organizatë.
“Ky objektiv mbetet prioritet kryesor strategjik i politikës së jashtme dhe sigurisë kombëtare për Kosovën, në bashkëpunim me partnerët ndërkombëtarë”, thuhet në njoftimin e Presidencës.
Osmani ka shprehur vlerësimin e saj për mbështetjen e rëndësishme, si dhe asistencën zhvillimore të ofruar nga NALT-i, në kuadër të misionit dhe mandatit të vet.
Ajo ka theksuar se mbështetja e dhënë nga ekipi i NALT-it ka qenë e rëndësishme për ta ndihmuar Kosovën të arrijë përparim të dukshëm drejt synimit të saj për anëtarësim në NATO.
Ndërkaq, Osmani e ka dekoruar drejtorin në largim të NALT-it, gjeneral brigade, Joachim Hoppe me Medaljen Presidenciale Ushtarake, në shenjë mirënjohje për kontributin e tij të rëndësishëm në përmbushjen e misionit të NALT-it në Kosovë.
“Për mbështetjen e jashtëzakonshme në ngritjen e kapaciteteve, edukimin dhe aftësimin profesional të Forcës së Sigurisë së Kosovës në përputhje me standardet e NATO-s. Ky nderim pasqyron vlerësimin dhe mirënjohjen e thellë të popullit të Kosovës për përpjekjet e jashtëzakonshme të gjeneral brigade, Joachim Hoppe dhe ekipeve të NALT-it” thuhet tutje në njoftim.
Duke shprehur mirënjohje për gjeneral brigade në largim Joachim Hoppe, Osmani ka shprehur edhe përkushtimin e saj për të punuar ngushtë me drejtorin e ardhshëm të NALT-it, gjeneral brigade, Ralf Peter Hammerstein për ta forcuar bashkëpunimin në të ardhmen.
Osmani ka potencuar se është e përkushtuar që të punojë ngushtë me NATO-n dhe të gjithë partnerët e saj, për të garantuar sigurinë dhe stabilitetin e Republikës dhe rrjedhimisht të rajonit, duke theksuar se Kosova mbetet plotësisht e përkushtuar ndaj prioritetit të saj strategjik – integrimit të plotë në institucionet euroatlantike.