Policia e Shqipërisë ka dhënë detaje të tjera në lidhje me sulmin në mediumin Top Channel, ku mbeti i vdekur roja i objektit.
Në njoftimin e tyre thuhet se automjeti i përdorur nga autorët, i është vjedhur një shtetasi kosovar në vitin 2020.
Sipas policisë, edhe targat e automjetit janë vjedhur pastaj në vitin 2022.
“Automjeti i përdorur nga autorët është i tipit “Range Rover Sport”, me ngjyrë kafe, i cili ka rezultuar i vjedhur më datë 10.07.2020, në fshatin Tale të Lezhës. Ky automjet i është vjedhur një shtetasi kosovar, i cili ishte me pushime në këtë zonë, ndërsa targat e automjetit “AA 456 HC”, janë kallëzuar të vjedhura më datë 31.12.2022, në qytetin e Tiranës”, thuhet në njoftim.
Policia e Shqipërisë ka ofruar shpërblim në vlerë prej 100 mijë eurosh për çdo informacion të vlefshëm që do të çojë në identifikimin e autorëve.