Anëtarët e panelit përzgjedhës për kandidatët për guvernatorë të Bankës Qendrore të Kosovës (BQK), sërish janë ftuar në mbledhjen e Komisionit për Buxhet, ku është diskutuar për listën që është dërguar në Kuvendin e Kosovës.
Me kritika nga deputetët e opozitës kishte vazhduar mbledhja e Komisionit për Buxhet, pasi është diskutuar edhe për konkursin për guvernator të BQK-së.
Deputeti i PDK-së, Mergim Lushtaku, ka thënë se ka konflikt interesi me njërin prej kandidatëve që është sjellë nga paneli përzgjedhës, pasi është edhe pjesë e bordit dhe ka kërkuar që komisioni t’i drejtohet Agjencisë Kundër Korrupsionit.
Ndërkaq, Avdullah Hoti nga LDK-ja ka akuzuar mazhorancën se i ka lënë pa udhëheqës të gjitha institucionet financiare, duke përmendur edhe Trustin, edhe BQK-në, të cilat nga nesër do të mbeten pa guvernator dhe se zëvendësguvernatori është ushtrues detyre.
Sipas Hotit, lista që është sjellë me emrat e 4 kandidatëve nuk i plotëson kushtet për të vazhduar në Kuvend.
Në pyetjen e deputetit të PDK-së, Ferat Shala, se kush do të udhëheqë me BQK, kryetari i Bordit të BQK-së, Bashkim Nurboja, ka thënë se kanë thirrur mbledhje të jashtëzakonshme për pasdite nëse arrijnë ta mbajnë, për të diskutuar për këtë çështje.
Ndërkaq, Shala e ka quajtur skandaloze përgjigjen e Nurbojës, se nuk e di se kush do ta udhëheqë BQK-në, ndërsa Shala ka pyetur se a do ta drejtojë BQK-në.
Shala më pas ka akuzuar Nurbojën se i gjithë procesi ishte inskenuar që ai të vinte në këtë pozitë
“Me pas tendencë me qenë guvernator kisha aplikuar, e kam shkollimin, i kam kualifikimet nuk është korrekte kjo mënyrë, kush ka dëshirë me qenë u.d për një javë”, ka thënë Nurboja.