Ukraina e ka shënuar më 31 mars njëvjetorin e tërheqjes së forcave ushtarake ruse nga qyteza Buchaa, duke lënë mbrapa qindra trupa të civilëve të vrarë nëpër rrugë.
Kievi i ka konsideruar ngjarjet në Bucha si masakër dhe krim rus të luftës.
Në një video të postuar në rrjetet sociale, presidenti ukrainas, Volodymyr Zelensky, e ka quajtur masakrën në Bucha “simbol të mizorive” të kryera nga ushtria ruse.
“Ne nuk do të harrojmë kurrë. Ne do t’i ndëshkojmë të gjithë fajtorët”, ka thënë Zelensky përmes një deklarate, shkruan Reuters.
Rusia e ka mohuar kryerjen e masakrës dhe ka pretenduar se vdekjet janë inskenuar nga Ukraina.
Zyrtarët ukrainas vlerësojnë se rreth 400 trupa të civilëve janë gjetur në Bucha, dhe një total prej më shumë se një mijë trupave, janë gjetur në rajonin rreth Kievit.
Shumica e trupave janë varrosur në varreza masive.
Hetuesit ukrainas dhe ata ndërkombëtarë kanë nisur hetime për krime të luftës në Bucha, Irpin dhe lokacione të tjera në Ukrainë, ku kanë ndodhur masakrat.
“Një vit më parë, Ukraina e ka çliruar Buçën dhe bota është zgjuar me fytyrën e vërtetë të pushtuesit rus. Buça është skenë krimi dhe simbol për të gjitha krimet ruse – vrasjet masive, dëbimet dhe shkatërrimin e të gjitha qyteteve”, ka thënë kryeministrja e Estonisë, Kaja Kallas, përmes një postimi në Twitter.
“Nuk ka kthim mbrapa – Rusia do të mbahet përgjegjëse”.
Lufta në Ukrainë ka nisur më 24 shkurt 2022.
Presidenti i Rusisë, Putin e quan luftën si “operacion special ushtarak” për ta çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës, kanë vdekur mijëra persona dhe miliona të tjerë janë zhvendosur nga shtëpitë e tyre.