Lideri i Aleancës për Ardhmërinë e Kosovës (AAK), Ramush Haradinaj, në seancën e Kuvendit të Kosovës ka thënë se do të marrin pjesë vetëm në seancat ku merren vendime për siguri, siç është Forca e Sigurisë së Kosovës.
“Si AAK jemi bashkë me opozitën në kundërshtimt të refuzimit të komisionit, por nuk jemi kundër Kosovës kur ka ligje që i kanë për siguri, ushtri. Do të jemi në seancë dhe në pikat e rëndësishme për vendin do të jemi në seancë, me këtë nuk nënkuptojmë që jemi kundër themelimit të komisionit”, ka deklaruar Haradinaj.
Tutje, Haradinaj ka thënë se Qeveria e Kosovës nuk mund të fshehë dhe se duhet të japë përgjegjësi për veprimet e saja në kohën e krizës energjetike që kishte kapluar vendin.
“Nuk keni shpëtim, vetëm jeni duka ia bërë vetes. Lejoni që të themelohet komisioni hetimor. Nuk mund të fshiheni me kundërkomision dhe nuk mund t’i ikni llogarisë për atë që ka ndodhur”, ka deklaruar Haradinaj.
Më herët, Haradinaj kishte deklaruar se në këtë seancë do të marrin pjesë në përzgjedhjen e gjyqtarëve të Gjykatës Kushtetuese.