Shefi i kabinetit të presidentes të Kosovës, Vjosa Osmani, Blerim Vela, ka thënë se Serbia po pretendon rrejshëm se Kosova po organizon zgjedhje “jodemokratike” në katër komunat në veri të Kosovës.
Vela përmes një postimi në Twitter, ka thënë se në përgatitjet që Komisioni Qendror i Zgjedhjeve (KQZ) është duke i bërë për zgjedhjet e 23 prillit, është duke marrë pjesë edhe Lista Serbe.
Ai ka paraqitur disa fakte që sipas tij “Serbia po përdor dhunë, intimidim, korrupsion dhe tani po ndërhyn në zgjedhje në veri të Kosovës dhe po pretendon rrejshëm se institucionet Kosovës po organizojnë zgjedhje “jodemokratike”.
Ai ka thënë tutje se institucionet e Kosovës kanë shtyrë zgjedhjet nga 22 dhjetori më 23 prill dhe se KQZ-ja e ka zgjatur afatin për regjistrimin e partive dhe kandidatëve nga 18 marsi më 22 mars.
“Kandidatët dhe partitë serbe janë regjistruar për zgjedhjet e 23 prillit. Lista Serbe është e përfaqësuar dhe merr pjesë në KQZ, ku bëhen të gjitha përgatitjet për zgjedhjet e 23 prillit”, ka vijuar ai.
Ndryshe, zgjedhjet e jashtëzakonshme në katër komunat verioret janë caktuar të mbahen më 23 prill, ndërsa Lista Serbe ka deklaruar zyrtarisht se nuk do të marrë pjesë.