Si “gënjeshtarë” janë cilësuar përfaqësuesit e QUINT-it nga ana e presidentit serb, Aleksandër Vuçiq, gjatë një fjalimi drejtuar opinionit vendor.
Mediumi serb “Danas” raporton se Vuçiq i quajti gënjeshtarë përfaqësuesit e QUINT-it, kritikoi BE-në, e cila sipas interpretimit të tij, “mbështet shqiptarët e Kosovës dhe dëshiron ta thyejë Serbinë”.
Shkak, raporton Danas, është fakti se ende nuk është formuar Asociacioni i Komunave me shumicë serbe, si dhe organizimi i zgjedhjeve në komunat në veri.
Presidenti i Serbisë, edhe pse u bëri thirrje serbëve që t’i bojkotojnë ato zgjedhje, pohon se kjo do të jetë arsyeja e mosformimit të Asociacionit, sepse komunat në veri të Kosovës do të udhëhiqen nga shqiptarët e Kosovës.
Ky fjalim i Vuçiq vjen një ditë para zgjedhjeve në katër komunat veriore të Kosovës.
E diela e 23 prillit është data kur do të mbahen zgjedhjet e jashtëzakonshme për kryetar të komunave në Mitrovicën e Veriut, Zubin Potok, Leposaviq dhe Zveçan.
Nga 44 sa kanë qenë në të kaluarën, kësaj radhe do të jenë 19 qendra votimi, e shumica prej tyre do të improvizohen në kontejnerë.
Numri i përgjithshëm i qendrave të votimit në këto katër komuna është 19, me gjithsej 34 vendvotime, prej tyre 6 janë qendra votimi të rregullta, me gjithsej 6 vendvotime, ndërsa 13 qendra të tjera votimi janë alternative, me gjithsej 28 vendvotime.
Për zgjedhjet në veri do të shtypen 43 mijë e 500 fletëvotime.
Që të tria komunat, Mitrovica e Veriut, Leposaviqi, Zveçani dhe Zubin Potoku kanë mbetur pa kryetar të komunave që nga nëntori i vitit të kaluar. Kjo pasi serbët braktisën institucionet e Kosovës për shkak të vendimit të Qeverisë së Kosovës për riregjistrimin e makinave me targa serbe.
Në garë për kryetar të këtyre komunave janë 10 kandidatë nga tri subjekte politike, prej të cilave, vetëm një nga komuniteti serb.