Qeveria e Kosovës të mërkurën e 26 prillit do të mbajë mbledhjen e radhës, ku pritet të shqyrtohen 19 pika të rendit të ditës.
Mbledhja do të fillojë në orën 10:00.
Gjatë kësaj mbledhjeje do të shqyrtohet Projekt-Rregullorja për Zëvendësimin apo mungesën e Përkohshme nga Puna e Nëpunësit Civil (MPB), pastaj edhe lista e artikujve të përbashkët të cilët janë në prokurim.
“Shqyrtimi i Propozim-vendimit për plotësimin e listës së artikujve për përdorim të përbashkët që janë objekt i procedurës qendrore të prokurimit, të aprovuar me Vendimin e Qeverisë Nr. 06/27 të datës 30 prill (MFPT)”, thuhet në pikën shtatë të mbledhjes së Qeverisë së Kosovës.
Në këtë mbledhje pritet të shqyrtohet edhe propozimi për ndarjen e mjeteve buxhetore për Forumin Ekonomik të Vjenës.
Ndryshe, deputetët e Kuvendit të Kosovës pritet të mblidhen në një seancë të jashtëzakonshme të mërkurën e 26 prillit.
Kjo seancë është thirrur nga Partia Demokratike e Kosovës për të diskutuar lidhur me rastin e arrestimit të shefit ekzekutiv të Korporatës së Energjisë së Kosovës Nagip Krasniqi.
Seanca pritet të nisë në orën 11:00.