Presidenti i Serbisë, Aleksandër Vuçiq, ka komentuar takimin e nivelit të lartë me kryeministrin e Kosovës, Albin Kurti, në Bruksel, ku do të diskutohet për të zhdukurit me forcë dhe ku do të prezantohet draft-statuti i parë i Asociacionit të Komunave me shumicë serbe.
Nëpërmjet një videoje në Instagram, Vuçiq ka thënë se do të jetë e vështirë dhe se të gjithë “të mëdhenjtë” e Perëndimit janë kundër tij.
“Kundër nesh janë të gjithë të mëdhenjtë në Perëndim”, tha Vuçiq, pa sqaruar se kujt i referohet saktësisht.
“Do të jetë e vështirë. Megjithatë, ligji dhe drejtësia janë në anën tonë. Më e rëndësishmja, ata nuk e kuptojnë se sa e fortë është dashuria për lirinë dhe sa fort mund ta ruash atë, me gjithë presionin. Rroftë Serbia!”, ka shkruar Vuçiq.
Kryeministri i Kosovës, Albin Kurti dhe presidenti i Serbisë, Aleksandër Vuçiq, takohen në Bruksel për një rund të ri bisedimesh për normalizimin e marrëdhënieve.
Kurti dhe Vuçiq janë takuar për herë të fundit në Ohër, më 19 mars, kur edhe janë pajtuar gojarisht për zbatimin e asaj që njihet si Marrëveshje Bazë, e që duhet të çojë drejt normalizimit të marrëdhënieve në mes të dyja vendeve.
Por, pas këtij takimi, palët i kanë interpretuar ndryshe-ndryshe detyrimet e tyre, ndërkohë që BE-ja ka theksuar se ato obligohen që t’i zbatojnë të gjitha pikat e marrëveshjes.
Dështimi për t’i zbatuar ato do të ketë pasoja, ka paralajmëruar BE-ja.