FC Prishtina ka bërë kërkesë zyrtare në Federatën e Futbollit të Kosovës, që gjyqtari Merban Bejtullahu është i “padëshiruar” në ndarjen e drejtësisë në ndeshjet e klubit nga kryeqyteti.
Lajmi është bërë i ditur në faqen zyrtare në klubit bardhekaltër në Facebook.
“Po ashtu, do të ndërmarrim të gjitha masat që me videoinçizime përcjellëse ta njoftojmë edhe UEFA-n edhe FIFA-n për gabimet e marra në dëm të ekipit tonë nga ky gjyqtar që njëherësh bartë edhe stemën e FIFA-s”, thuhet ndër të tjera në reagimin e klubit.
Arsyet e marrjes së këtij vendimi, sipas komunikatës zyrtare “janë të shumta dhe që nga fillimi i këtij edicioni e deri te ndeshja e fundit me Llapin kur anulohet goli i rregullt”.
Në anën tjetër, nuk ka pasur ndonjë reagim nga FFK-ja lidhur me këtë rast. Prishtina gjendet në vendin e katërt në tabelën e Superligës, me 42 pikë të grumbulluara dhe gjendet në finale të Kupës së Kosovës.