Ministri i Mbrojtjes, Armend Mehaj, ka njoftuar se në kuadër të përgatitjeve për ushtrimin fushor “Defender Europe 23”, Regjimenti i parë i Forcave Tokësore është duke kryer përgatitjet finale për ushtrim.
Nëpërmjet një postimi në rrjetin social, Facebook, ka theksuar se ushtarët e FSK-së janë të gatshëm për çdo sfidë.
Po ashtu, ai ka thënë se Kompania B e Regjimentit të parë të këmbësorisë, përgjatë dy javëve, ka realizuar patrullimet luftarake në kushte të natës.
Sipas tij, qëllimi i këtij ushtrimi ishte aftësimi i pjesëtarëve për manovrim dhe drille të betejës gjatë natës me anë të pajisjeve të natës (NVG).
Një ditë më parë, të enjten, Mehaj kishte njoftuar se Kontingjenti i Forcës së Sigurisë së Kosovës ka përfunduar me sukses misionin bashkëzbarkues përkrah forcave britanike në Ishujt Falkland, që sipas tij, ka për qëllim ngritjen e kapaciteteve operacionale dhe ndërveprushmërisë me forcat e shteteve partnere për të shërbyer në të ardhmen në misionet e paqes kudo që kërkohet.