Kryeministri i Shqipërisë, Edi Rama, ka përsëritur edhe këtë të martë thirrjen për dialog me studentët, ndërsa protestat kundër qeverisë në Tiranë kanë hyrë në ditën e 14-të.
Përmes një postimi në rrjetet sociale, Rama ka publikuar pamje të ulëseve të vendosura para Kryeministrisë, duke përcjellë sërish mesazhin për dialog me protestuesit.
Protesta, e cila fillimisht lidhej me kërkesat për arsimin, është shoqëruar edhe me thirrje për dorëheqjen e kryeministrit. Studentët dhe të rinjtë që u janë bashkuar protestave kërkojnë largimin e Ramës nga detyra dhe deri më tani kanë refuzuar ftesën e tij për dialog.
Gjatë ditëve të fundit, protestat janë shoqëruar edhe me përplasje mes policisë dhe protestuesve, ndërsa tensionet janë rritur me vazhdimin e tubimeve.
Rama ka deklaruar se është i gatshëm të dialogojë me studentët, por ka përjashtuar mundësinë e dorëheqjes. Ai ka thënë se ka një kontratë me qytetarët, duke iu referuar mandatit të marrë përmes zgjedhjeve.
Ndërkohë, protestuesit vazhdojnë të këmbëngulin në kërkesën për dorëheqjen e kryeministrit, ndërsa mbetet e paqartë nëse palët do të arrijnë një marrëveshje përmes dialogut.