Presidenti i Shqipërisë, Bajram Begaj, për zgjedhjet lokale që po mbahen këtë të diel në Shqipëri, ka thënë se është një ditë e rëndësishme në demokraci.
“Unë sot ushtrova detyrën time, detyrën si qytetar. Natyrisht që çdo shtetas i Republikës së Shqipërisë me të drejtë vote, sot ka ditën që të dëgjohet, që vota e tij të lexohet”, ka thënë Begaj.
“Fuqia dhe pushteti i votës së tij të bëjë ndryshim”, ka thënë tutje presidenti shqiptar.
Begaj është shprehur se këto votime janë të qytetarëve dhe duhet t’u shërbejnë atyre.
Në këtë të diel (14 maj) mbahen zgjedhjet lokale në Shqipëri, ku rreth 140 kandidatë do të synojnë të marrin drejtimin e 61 bashkive në tërë Shqipërinë.