Si pasojë e të shtënave me armë zjarri, një person ka mbetur i vrarë në Gushtericë të Graçanicës. Dorasi dyshohet të jetë zyrtar policor.
RTV Dukagjini ka mësuar se viktima dhe i dyshuari janë vëllezër, të cilët i përkasin nacionalitetit serb.
Zëdhënësja e Policisë së Kosovës për rajonin e Prishtinës, Flora Ahmeti ka treguar për televizionin se i dyshuari për vrasje është arrestuar.
“Sot rreth orës 15:00, kemi pranuar informatën për të shtëna me armë zjarri, në fshatin Gushtericë e Poshtme. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të cilat kanë hasur në një person pa shenja jete. Vdekjen e viktimës (mashkull) e ka konstatuar ekipi mjekësor në vendngjarje”, ka thënë Ahmeti.
Hetime për rastin i ka nisur edhe Inspektorati Policor i Kosovës (IPK).
“Personi i dyshuar (zyrtar policor) është arrestuar ndërkohë që aktualisht hetuesit policorë në bashkëpunim me IPK-në, kanë nisur një hetim për sqarimin e të gjitha rrethanave që lidhen me rastin”, ka thënë ajo.
Policia dhe njësitë tjera përkatëse duke përfshirë mjekësinë ligjore kanë qëndruar gjatë tërë pasdites në vendin e ngjarjes.
Ndërsa fqinjët e personave të përfshirë në këtë rast nuk kanë pranuar të deklarohen.