Zëdhënësi i Komunës së Podujevës, Fahri Zhitia, ka deklaruar se kompania me qendër në Prizren, e cila e ka fituar tenderin e pastrimit të makinave zyrtare, është e pozicionuar në Komunën e Podujevës.
Në një lidhje telefonike në emisionin “Radar” me Edita Dolin në Radio Dukagjini, Zhitia ka konfirmuar se origjina e kompanisë është nga Prizreni, por që do të operojë në Komunën e Podujevës.
“E vërteta qëndron se operatori ekonomik, i cili e ka fituar tenderin, e ka një objekt këtu, të cilin e ka marrë me qira në rrugën “Xhemajl Mustafa” në Podujevë. Ai objekt është me autolarjen “Rremi” siç treguam në faqen e Komunës. Ai shërbimin do ta kryejë në Podujevë, veturat e komunës do të pastrohen këtu në Podujevë”, ka deklaruar Zhitia.
Tenderi për autolarjen zyrtare të Komunës së Podujevës ishte shpallur para pak javësh. Zhitia ka treguar se është hera e tretë me radhë që shpallet ky tender, dhe për të kishte vetëm një aplikues.
Ndër të tjera, zëdhënësi Zhitia ka treguar se Komuna e Podujevës është duke zhvilluar edhe të tjera projekte, ndër to atë të emergjencës së qytetit.
“Kemi shumë projekte të cilat janë duke u realizuar. Gjatë kësaj kohe është duke u realizuar projekti i emergjencës së qytetit, është njëri prej projekteve më moderne, jo vetëm në Kosovë, por ndoshta edhe në Ballkan prej 1.7 milion eurosh…”, ka deklaruar Zhitia.
Një tjetër projekt nga Komuna e Podujevës do të jetë stacioni i autobusëve dhe ndërtimi i rrugëve të reja.